هذا الخطا اللي ماتوقعت يخطيه

[ذيب الغدراء]

هذا الخطا اللي ما توقعت يخطيه
شف كيف كشر طيب القلب نابه
أثر الحسد لا عشعش بصدر راعيه
يجعل من قلوب الحبايب ذيابه
اللي تعلم من سكوتي تماديه
علمني استقبل خطاه برحابه
والواجب انه لو جحد فزعتي فيه
ما يجحد حقوق النسب والقرابه
وانا اللي يوم ان المصايب تبكيه
كنت اقرب له بضيقته من ثيابه
ومن لا وقف لي وقفة رجال ما ابيه
يغني عن حضور المقفي غيابه
من لا فزع بالكايده مع بني خيه
وقت الرخا ما يحسب حساب لابه
علمت غيري كيف لا صد ما جيه
وانا تعلمت الصبر والصلابه
الضعف ما طيقه ولا اطيق طاريه
والدمع لا يرقى ولا ينرقابه
بدري علي احسب له احساب اوجيه
وبدري عليه يشيلني من حسابه
كأني عتقته باأعتقه رأفة فيه
إلا الطلابه ما خشيت الطلابه
مهب على شانه عشان المشاريه
سامحت طيشه وابتليت بعذابه
اليا كسر في خاطرك شخص تغليه
حتى المعاتب تستحي من عتابه
اللي بيدخل في مزاجي باأسويه
وباأخاطب الفض الغليض بخطابه
مثل الغلا اللي بآخذه منه بعطيه
ويسمع جوابي مثل ما اسمع جوابه
ومثلي لا من قلت لك قول يوفيه
والقرم لامن وكد العلم جابه
سمه تحدي سمه اللي تسميه
بس الوكاد انه مهوب استجابه
أخوكم / ذيب الغدراء